Husumer Nachrichten - 28.03.2014 - Seite 9
Levin un Lisa: Platt – se sünd dorbi
De Schöler vun Pellworm un Heide nehmt in’n Mai an de Regionalwettbewarv deel
Husum Dat weer’n Opregung för de acht Jungs un Deerns, de sik güstern in de Husumer Werkstätten to’n plattdüütschen Vörlesewettbewarv dropen hebbt ...
Se sünd all schon de Besten vun ehr’ Klasse un ehr’ School worrn, man hier geiht dat nu üm de nächste Runn bi „Schölers leest Platt“.
Nomtje Kammann ut Husum, Annike Maart vun Nordstrand, Levke Matthiesen ut Horstedtfeld, Edda Meister ut Welt, Levin Petersen vun Pellworm, Lisa Pioch ut Heide, Johanna Risch ut Ostenfeld und Fynn-Marvin Thoms ut Witzwort schulln nu een fachkunnige Jury övertügen, dat se nich blots goot lesen sünnern ok goot betonen könnt – un dat alln’s ok noch op ’n gode Platt.
De lütten Geschichten op twee Sieden kunnen sik de Jungs un Deerns ut een Book utsöken. To Huus harrn se örnli lesen öövt un goot weern se all.
So harr de Jury mit Truels Hansen, Ingrid Hinrichsen, Nanke Andresen, Frenz Bertram un Ingwer Oldsen dat ok bannig swoor, sik för twee to enscheden, de nu in Mai an de Regionalwettbewarv in Schleswig orrer Leck üm de Titel Regionalsieger kämpfen mööt. So harrn se sik besluten, dat dat de erste, tweete un dritte Platz geev un all de annern sik een schöne Veerte delen kunnen.
Lisa Pioch hett sik op de tweete Platz lesen. Verdeent wunnen hett Levin Petersen mit sien Geschicht „Blots een Droom“. De Ölmjährige vun Pellworm hett keen Problem mit dat Plattdüütsche. Mit sien Vadder snackt he to Hus Platt, mit sien Mudder Englisch – ehr Moderspraak – un in’ne School lehrt he Hochdüütsch. Vörlesen maakt em bannig veel Spaaß, Theoter spelen in’ne School ok, vertellt he un grient. Man anners speelt he ok geern Football orrer fohrt mit sien Rad. För düssen Dag weer he vun middags mit sien Vadder Hermann un sien Lehrerin Ursel Bell bet avends ünnerwegens. Lohnt hett sik dat för em wiß’.
Sien Lehrerin weer ok bannig stolt op em: „Das hat er bombig gemacht.“ Un op de Fraag, worüm ok de Lehrerin mit vun de Partie is, smuustert se: „Wir sind eine kleine Inselschule, da lassen wir unsere Schätzchen doch nicht allein.“
Renate Poggensee, Baas vun de Kinnergorrn in Tönn, un Marianne Ehlers vun de Schleswig-Holsteinische Heimatbund (SHHB) föhrten dör de Namiddag. Siet 35 Johrn warrt „Schölers leest Platt“ dör de Sporkassen ünnerstütt. Nu sünd ok de SHHB un de Büchereizentrale Schleswig-Holstein mit in’t Boot. Wiest warrt dat dörch een niege „Roll-Up“ mit de Slogan „Platt – ik bün dorbi“.
Över 300 Schoolsieger hett dat düt Johr geven, sä Poggensee. Een Drittel vun all de Scholen in Land maakt mit, dat is een bannig gode Andeel un wichtig, darmit Plattdüütsch ok vun de nächste Generatschoon snackt warrt.
|